ალბათ ყველას გვახსოვს გასაოცარი სილამაზის ბრილიანტი ფილმიდან ”ვარდისფერი პანტერა”. აღმოჩნდა, რომ მსოფლიოში მართლაც არსებობს ასეთივე ფერის იშვიათი ქვა, რომელიც ფილმის შემქმნელების გამოგონებისგან მხოლოდ ფორმითა და ზომით განსხვავდება. ბრილიანტის ფერი იმდენად დატვირთულია, რომ ზოგიერთს შეიძლება მისი დაგემოვნებაც კი მოუნდეს. ხუთკარატიანი ქვა, რომლის სახელწოდებაც "The Vivid Pink”-ია, ჰონკონგში, Christie’s-ის აუქციონზე მიმდინარე წლის დეკემბერში გაიყიდება. ბრილიანტი, რომელიც ერთ დროს Graff-ის ბეჭედს ამშვენებდა, ერთ-ერთ კერძო კოლექციაში იპოვეს. აუქციონის ორგანიზატორები მისი გაყიდვიდან 5-7 მილიონი დოლარის მიღებას გეგმავენ. Christie’s-ის სახლის წარმომადგენლების განცხადებით, ქვა ერთ-ერთი მსხვილი და კაშკაშაა იმ ბრილიანტთაგან, რომელიც ოდესმე აუქციონზე გამოუტანიათ. "The Vivid Pink” განსაკუთრებულ ფასეულობას წარმოადგენს, ვინაიდან მისი ბუნებრივი ფერი არასდროს შეუცვლიათ და არც კრისტალებით დაუტვირთიათ ხელოვნურად. აღსანიშნავია ისიც, რომ ნატურალურ ბრილიანტებში კაშკაშა ვარდისფერი იშვიათად გვხვდება: ასი ათასი ქვიდან მხოლოდ ერთი შეიძლება ჩაითვალოს ფერისა და ხარისხის სრულყოფილებად. აუქციონამდე ბრილიანტს ნიუ-იორკში, სინგაპურში, ბანკოკში, ჟენევასა და ტაიბეში წარადგენენ.